Dnja 17. septembra 2026 wotmě so na wulkej žurli Budyskeho krajnoradneho zarjada lětušefachowe schadźowanje wokrjesow a gmejnow serbskeho sydlenskeho ruma. Přeprosył bě zamołwity za serbske naležnosće wokrjesa Budyšin, Tomaš Korch. Dokelž běchu ze Zhorjelskeho wokrjesa jenož mało přizjewjenjow dóšli, je tamniša społnomócnjena za naležnosće Serbow Kati Strukowa po wothłosowanju ze Zhorjelskim krajnym radu Stephanom Meyerom separatne zatkanje za komuny Zhorjelskeho wokrjesa namjetowała. Tak wostachu zastupjerjo Budyskeho wokrjesa mjez sobu. Po witanju přez přirjadnika wokrjesneho rady, Jörga Szewczyka, předstaji nawoda Budyskeje regionalneje wotnožki Krajneho zarjada za šulu a kubłanje (LaSuB), Mathias Peter dwurěčne šulske kubłanje w serbskim sydlenskim rumje. Tema bu wuzwolena, dokelž su mnohe šule regiona w nošerstwje komunow a bjezposrědnje wot temy potrjechene. Dr. Jens Baumann ze Sakskeho statneho ministerstwa za nutřkowne rěčeše wo serbskim komunalnym programje a z tym zwjazanym pawšalnym spěchowanjom. Wón skedźbni na problemy při dalšim financowanju programa, wosebje na pawšalnu přiražku, kotraž tuchwilu 4 500 eurow na lěto a gmejnu. Wučinja. Tale suma kaž tež srědki za dźěło serwisoweho běrowa we Wojerecach maja so w dwójnym etaće Swobodneho stata Sakskeje za lěće 2027/28 wobkedźbować. Tak by dalše dźěło serwisoweho běrowa kaž tež dobre dźěło w komunach w zmysle zjawnje widźomneje dwurěčnosće zawěsćene było. Borbora Zyndźic a Jan Kral rozprawještaj wo dźěle serwisoweho běrowa. Jan Kral skedźbni na dobre wuslědki dotalnych aktiwitow. Nimo wulkeho spektruma přełožkow zarjadniskich podłožkow wobsteješe dźěło zarjada předewšěm w poradźowanju a podpěrje komunow při zmysłapołnym a zaměrnym wužiwanju pawšalneho spěchowanja. W lěće 2026 wopytachu sobudźěłaćerjo serwisoweho běrowa mnohe gmejny na městnje a tute direktnje na městnje poradźowachu. Dalši wobłuk, w kotrymž móže a dyrbi so hišće dźěłać, su homepage komunow. Tu je hišće wjele móžnosćow za dwurěčne wobsahi a wuhotowanje. Serwisowy běrow wotpowědnu podpěru poskića. Borbora Zyndźic je prěnje mustry dwurěčnych formularow předstajiła, kotrež je zarjad naćisnył. Gmejny su nětko namołwjene, so k tomu wuprajić. Formulary hodźa so tež digitalnje wužiwać a online wupjelnić. Zestajenje formularow je dalši poskitk serwisoweho běrowa, při čimž móža komuny na městnje drobne změny pozdźišo same přewjesć.
Pjatk, dnja 22. meje wopyta nas we Wojerecach referent w sakskim ministerstwje za nutřkowne a zamołwity za spěchowanje komunow w serbskim sydlenskim rumje, dr. Jens Baumann. Na wuradźowanju wobdźělichu so nimo jednaćelski Domowiny, Judit Šołćineje tež sobudźěłaćerjo serwisoweho běrowa Borbora Zymdźic a Jan Kral na městnje a dr. Sara Mičkec, kotraž bě přez internet z nami zwjazana. Hłowny wobsah wuradźowanja bě spěchowanska pawšala Sakskeje za komuny w serbskim sydlenskim rumje wokrjesow Budyšin a Zhorjelc. Pawšala je w zašłosći mnohim komunam runała puć k zwoprawdźenju zjawneje a widźomneje dwurěčnosće. Po wjacorych wopytach w komunach pokazuje so, zo maja gmejny a města ćeže, srědki z pawšale zmysłapołnje a wotpowědnje zaměrej zasadźić. Tohodla je trěbne, zo so gmejny mjez sobu informuja a pomhaja z idejemi kaž tež dobrymi přikładami. Sobudźěłaćerjo serwisoweho běrowa chcedźa za to znosyć wšitke dotalne ideje a zaměry komunow jako zakład za dalše zasadźenje pawšale. kaž dr. Baumann zwurazni, je wosebje ćežko, nastajić aktualny hospodarski plan. Sakske statne knježerstwo planuje na zakładźe njedosahacych srědkow wšelake wudawki skrótšić. To móhło tež spěchowansku pawšalu a samo běrow potrjechić. Hišće njeje ničo doskónčnje rozrisane, ale mamy so na snano mjenje srědkow a z tym na wjetše wužadanja w dźěle za dwurěčnosć w serbskim sydlenskim rumje nastajić. Spěchowanje dwurěčnosće w zjawnym žiwjenju serbskeho sydlenskeho ruma njesměło so zaončić, dokelž je so w minjenych šesć lětach wobstaća serwisoweho běrowa w komunach wjele dobreho a pozitiwneho wuwiło a zwoprawdźiło. Z toho su mnohe komuny profitowali a so skrućili w prócowanjach wo zjawnu dwurěčnosć. To dybjało tež přichodnje móžno być.
Dźens bě Kati Strukowa, społnomócnjena za serbske naležnosće wokrjesa Zhorjelca, na wopyće w serwisowym běrowje.
Wuradźowachmy wo aktualnych temach a přihotowachmy fachowe schadźowanje ze zastupjerjemi komunow.
Dźakujemoj so jej za konstruktiwne zhromadne dźěło!
Heute war Kati Struck, die Beauftragte für sorbische Angelegenheiten des Landkreises Görlitz, zu Besuch im Servicebüro in Hoyerswerda.
Ein Austausch zu aktuellen Themen und die Fachtagung der kommunalen Vertreter der beiden Landkreise Görlitz und Bautzen stand auf dem Tagesplan.
Vielen Dank für die konstruktive Zusammenarbeit!
Běrow ma nowej sobudźěłarce. Po tym, zo je so Franciska Grajcarekowa w oktobru 2025 do maćerneho dowola podała, ma běrow za čas jeje swójbnych winowatosćow nowej sobudźěłarce. Tutej dźělitej sej dźěłowe městno Franciski. Wot 1. oktobra 2025 dźěła dr. Sara Mičkec (pochadźaca z Worklec), nětko w Južnym Tirolu doma, za běrow a wot 1. nowembra 2025 podpěruje Borbora Zyndźic (pochadźaca ze Smochćic), nětko w Lipsku, dźěło serwisoweho běrowa. Wobě stej studowałoj pak slawistiku pak sorabistiku a matej tuž najlěpše wuměnjenja, přełožowanski serwis za komuny serbskeho sydlenskeho ruma zawěsćić. Wonej dźěłatej za běrow online a tydźeńsce sej dorěčimy dźěłowe wobłuki a ćežišća nadawkow. Jan Kral je dale w běrowje we Wojerecach prezentny a je najbliši kontaktny partner za komuny w serbskim sydlenskim rumje. Dźěło běrowa je tak dale na dobrym a fachowje derje zawěsćenym niwowje zaručene. Lětsa chcemy komunam wosebje nastupajo jich web-strony pomhać a tam, tak daloko kaž móžno, dwurěčnosć zawěsćić. Wotpowědnu pomoc smy komunam hižo signalizowali.
K 5.razej a k 1. razej scyła w Zhorjelskim wokrjesu wotmě so fachowa konferenca wyšich měšćanostow, měsćanostow, wjesnjnostkow a wjesnjnanostwo komunow serbskeho sydlenskeho ruma. Na žurli Serbskeho kulturneho centruma w Slepom witaše społnomócnjena za serbske naležnosće Zhorjelskeho wokrjesa, Kati Strukowa, nahladnu ličbu komunalnych politikarjow. Powitanske słowa měješe krajny rada Zhorjelskeho wokrjesa, dr. Stephan Meyer. Wón zwurazni swoju spokojnosć nad dobrym rozsudom demokratiskich mocow Zhorjelskeho wokrjesneho sejmika, kotrež běchu za to hłosowali, zo wostanje městno społnomócnjeneje za serbske naležnosće dale hłownohamtske a so tak přećiwo planam AfD přesadźili, městno na čestnohamtske redukować. Nimo toho zwurazni Meyer sylnu nadźiju, zo so wosebje w komunach Zhorjelskeho wokrjesa zaso rěčne rumy za serbsku rěč zarjaduja a dwurěčnosć w serbskim sydlenskim rumhe hišće wuraznišo w zjawnym žiwjenju skutkuje. Fachowa konferenca móhła k tomu impulsy a nastorki dać, štož so w dalšim wotběhu konferency tež jasnje pokaza. W dwěmaj přednoškomaj předstajichu so móžnosće, serbsku rěča kulturu do turizma runje tak zapřijeć kaž do čestnohamtskeho angažementa mnohich wobydlerjow serbskeho sydlenskeho ruma. Pětr Brězan, předsyda towarstwa Serbski kulturny turizm z.t., předstaji nowu kolesowarsku šćežku "Serbske impresije", kotraž přeprošuje, na mnohich markantnych městnach Łužicy so kolesuju zetkać ze serbskej rěču, kulturu a wuměłstwom. Z rěču,kulturu a wuměłstwom zaběraše so tež přichodny přinošk Sonje Hrjehorjoweje a Jadwigi Bryckec. Wonej předstajištej móžnosće, wutworić syć, kotraž spleće mjenowane wobłuki z čestnohamtskim dźěłom a tak rěčne rumy skrući a wutworja.
Dr. Jens Baumann, wotrjadnik w Sakskim ministerstwje za nutřkowne a tam tež zamołwity za naležnosće Serbow předstaji wospjetnje móžnosće spěchowanja dwurěčnosće w gmejnach serbskeho sydlenskeho ruma. Nažel wšitke gmejny pawšalu we wysokosći 5 000 eurow lětnje njewotwołaja a tak tute pjenjezy lětsa nažel spadnu a druhe, zajimowane gmejny, je njemóža za swoje zaměry zasadźić. my běchmy lětsa z hosćom wuradźowanja a njemějachmy zadyn konkretny nadawk. wužichmoj pak składnosć, so z komunlanymi poltikarjemi rozmołwjeć a tak spytać jich problemy spóznać a jich zajimy za dalše ideje wubudźić. Fachowa konferenca bě zaso wuspěšne, nic naposled dla sylneho wobdźělenja mnohich wjesnjnostow a dewju wjesnjanostkow, teje z Radworja a teje z gmejny Halštrowska hola. Dźak wšitkim!!