Studentki Wysokeje šule za wobnowjomne energije w Eberswalde (HEEN) su so we wobłuku studija regionalneho managementa zaběrali z dwurěčnosću w biosferowym rezerwaće Hornjołužiskeje hole a hatow. Zo bychu to w šěršim kruhu pohłubšili, su sej přeprosyli na dźěłarničku dnja 17. junija do Domu tysac hatow w Stróži zastupjerjow tych institucijow, kotrež so ze serbskej rěču w tutym wobłuku zaběraja. Nimo zastupjerjow Budyskeje župy běchu tež přitomni čłonojo ZARI a tež naš běrow bě přez Jana Krala zastupjeny. Wjednistwo biosferoweho rezerwata bě swoje rumnosće za tutu płódnu dźěłarničku přewostajiło. W běhu dweju hodźinow wuprajichu so přitomni za dalšu widźomnu a čujomnu prezencu serbšćiny na teritoriju rezerwata. K tomu zrodźichu mnohe dobre ideje a wuměnichu sej swoje dotalne nazhonjenja w tutym wobłuku. Nawoda rezerwata, Torsten Roch wupraji to, štož je bytostne za wšitkich: "Biosferowy rezerwat smy my wšitcy!" Tak mamy tež wšitcy přinošować, zo je dwurěčnosć, wosebje tež serbšćina tam widźomna, hdźež so wo rezerwaće rěči a hdźež rezerwat swojich wopytowarjow a hosći wita a přewodźa. Ale nic jenož tam, ale po cyłej dwurěčnej Łužicy.
Za naš běrow smy sej wzali mnohe dobre ideje sobu, kotrež móžemy našim komunam sposrědkować jako namjety k zasadźenju pawšalneho spěchowanja w swojich gmejnach a městach. Mnohe z tutych su zdźěla abo scyła dźěl biosferoweho rezerwata. Ale tež druhe komuny móhli z nazhonjenjow a wučbow dźěłarnički profitować. W našim přichodnym dźěle chcemy to gmejnam a městam sposrědkować.