Dołho je so wo tym rěčało a mnozy su sej to přeli: Technika za simultane přełožowanje na dwurěčnych zarjadowanjach je dóšła.
Štwórtk, 28. meje přepoda předsyda Domowiny Dawid Statnik serwisowemu běrowej we Wojerecach naročnu techniku. Z tutej hodźi so nětko simultanje w dobrej kwaliće přełožować. Za dohromady 40 wobdźělnikow najwšelakorišich zarjadowanjow komunow serbskeho sydlenskeho ruma steji technika wot nětka k dispoziciji. Hišće štwórtk zdźěli serwisowy běrow gmejnam w serbskim sydlenski rumje, zo maja wotnětka ze simultanej techniku dalšu móžnosć dwurěčnosć w swojim dźěle wožiwić a rozšěrić. Je to dalši krok do zjawneje žiweje dwurěčnosće.
Wojerowski serwisowy běrow wupožčuje připrawu darmotnje na komuny, kotrež maja na tym zajim. Tuchwilu dźěła běrow z połnej paru na posłužowanskim přehledźe, tak zo móže so technika bórze po serbskich gmejnach wupožčować.