Město Wóspork je swoju internetowu stronu wobnowiło. Při tym su zamołwići tež na to dźiwali, serbšćinu sobu wobkedźbować. Hižo w aprylu je měšćanosta Jürgen Arlt našemu běrowej napřećo wuprajił přeće, zo by wjace serbskeho wo měsće a wokolinje na internetowej stronje wozjewił. Za to je nam město připósłało zajimawostki a informacije k městu a měšćanskim dźělam- wjeskam - komuny. Z toho smy sčinili serbki wobsah internetoweje strony města. Přistajeni města su to potom derje do startoweje strony města zadźěłalia a pod logom "Sorbisch - na klar!" móža so zajimcy wo měsće tež w serbskej rěči informować. Chwalobna iniciatiwa města to je. Druhe města w serbskim sydlenskim rumje njech sej to jako přikład bjeru. Wosebje naša "stolica" Budyšin ma tu hišće  rezerwy.

We Wojerowskej nowej radnicy zetkachu so 1. septembra na přeprošenje społnomócnjeju za serbske naležnosće wokrjesow Budyšin a Zhorjelc, Haleny Jancyneje (BZ) a Kati Strukoweje (GR) wjesnjanosća/měšćanosća a jich zastupjerjo z komunow serbskeho sydlenskeho ruma k lětnemu fachowemu zetkanju. Na wuradźowanju dźěše wo to, so mjezsobnje wuměnić, hdźe a kak hodźi so hišće lěpje na dwurěčnosć w zjawnym rumje komunow pokazać. K zazběhej předstajištaj Diana Pawlikowa a Julian Nyča projekt ZARI a jeho wobsahi a zaměr. Dźěło a zaměr projekta wjedźe nimale do samsneho směra, kaž napinanja serwisoweho běrowa. To wuzběhnyštaj a potwjerdźištaj sobudźěłaćerjej běrowa, Franciska Grajcarekec a Jan Kral, kotrajž móžeštaj znowa pozitiwnu bilancu dźěławosće wozjewić. Jako třeći rěčnik pokaza dr. Jens Baumann ze SMI hišće raz na spěchowanje a podpěru ministerstwa nastupajo dwurěčnosć w komunach. Lětsa je wjac gmejnow swoju pawšalu wotwowało a ju derje nałožowało. Tučasnje je jenož hišće 4 300 eurow k dispoziciji, loni bě to w samsnym, času hišće nimale 20 000 eurow.

Zahajił bě wuradźowanje Budyski krajny rada Udo Wićaz, kotryž wobdźělnikow tež w mjenje swojeho Zhorjelskeho kolegi postrowi. Wón skedźbni na wosebity wuznam dwurěčnosće we wokrjesomaj a zo ma so tute kubło zachować a we wšědnym dnju komunow wotbłyšćować. Tomu přinošuje dźěło serwisoweho běrow a projekta ZARI.

Sakski statny minister za nutřkowne, Armin Schuster (CDU) je póndźelu, 15.meje přepodał spěchowansku zdźělenku sakseho krajneho knježerstwa za serwisowy běrow we Wojerecach. Sakski krajny sejm je w swojim aktualnym dwójnym hospodarskim planje wobzamknył rozšěrjene spěchowanja serwisoweho běrowa w nowej dobje 2023/24. Z tym je zaručene połne přistajenje wobeju sobudźěłaćerjow běrowa. To je trěbne, dokelž je so běrow w minjenym času wuwił dźeń a bóle na srjedźišćo podpěry a poradźowanja za komuny w serbskim sydlenskim rumje. Rosćacych nadwkow gmejnow a městow dla je trěbne, naprašowanja a nadawki w dale dobrej kwaliće a přiměrjenym času zwoprawdźić. Nimo toho chcemy so  lětsa zaso podać do gmejnow a tam direktnje z wjesnjanostami abo zamołwitymi na městnje k temje dwurěčnosć w zjawnosći rěčeć a jich poradźować.Tohodla su nam přidatne srědki Sakskeje wulka pomoc, gmejnam hišće lěpje a efektiwnišo pomhać, nadawki nastupajo dwurěčnosć w zjawnym žwjenju komunow zwoprawdźić. Na swjatočnym přepodaću zdźělenki wobdźělichu so nimo předsydy Domowiny, Dawida Statnika tež dalši komunalni politikarjo a zastupjerjo medijow. We woprawdźe přijomnej atmosferje so z ministrom hišće dołho wo wšelakich nalěznosćach rozmołwjachmy a mějachmy wjele wjesela při tym. Ministrej je so pola nas znowa derje lubiło.

Přidatna podpěra je za naš běrow wuraz spokojnosće ze stron sakskeho knježerstwa za naše dźěło a zdobom pohon do dalšeho spomóžneho skutkowanja. 

K lětušim jutram smój na města a gmejny w serbskim sydlenskim rumje přepodali mały jutrowny postrow. K tomu smój připołožiłoj někotre podłožki a informacije, kotrež móža komuny w swojim dwurěčnym dźěle trjebać.

Smój dwaj dnjej po puću byłoj, wot Zhorjelca přez Wojerecy hač do Sprjewineho Doła, wot Chrjebje-Noweje wsy hač do Łaza.

Někotrych wjesnjanostaow a měšćanostow smój na městnje zetkałoj a so z nimi na dalše zhromadne dźěło dojednałoj.

Wšitcy běchu překwapjeni a so přez naš postrow zwjeselichu.