Saksi statny minister za nutřkowne, Armin Schuster (CDU) je póndźelu, 5. decembra 2022 naš běrow wopytał. Jeho witaše při zachodźe předsyda Domowiny Dawid Statnik, hromadźe ze zapósłancom strony CDU w sakskim krajnym sejmje , Markom Šimanom. Ministra přewodźeše wotrjadnik w ministerstwje a zamołwity za spěchowanje serbskeho sydlenskeho ruma, dr. Jens Baumann.
W jara žiwej a wotewrjenej rozmołwej předstaji Dawid Statnik běrow a jeho dźěławosć a pokaza na najwšelakoriše nadawki a wukony běrowa. Minister Schuster so za dźěło běrowa jara zajimowaše a slubi dalšu podpěru swojeho ministerstwa, wosebje při přesadźenju porjadneho wopisanja wjesnych taflow, kotrež maja němske a serbske pomjenowanja w samsnej wulkosći měć.
Minister Schuster zwěsći wěste paralely k jeho domiznje (alemaniski dźěl Badenskeje), hdźež su podobne struktury kaž w serbskim sydlenskim rumje, ale dotal bjez zarjadniskeho a zakońskeho rjadowanja. Tohodla je po jeho měnjeju ćim wažniše, serbski sydlenski rum dale spěchować a wosebje z pomocu pawšale dwurěčnosć w zjawnym žiwjenju dale wutwarić. Wuraz za připóznaće a hódnoćenje dźěła běrowa je, zo so etat za běrow w přichodnymaj lětomaj zwyši. Z tym su dalše móžnosće, hišće efektiwnišo dźěłać date. Chcemoj klětu na kóždy pad wjace gmejnow wopytać a na městnje so k dalšemu zhromadnemu dźěłu dorozumić. Franciska Grajcarekec předstaji z krótkeja, ale jadriwej prezentaciju wažne wuspěchi a posłužby běrowa, kotryž je pola komunow witany a dźeń a bóle připóznaty.